Novas Aristanesas, chenàbura 14 de làmpadas de su 2024

Arborea cumentzat a pensare a sa Sagra de sa Pulenta – Pulenta, pulenta, pulenta, ma no isceti pulenta. Arborea si preparat pro sa sagra de atòngiu intra de tastaduras, mùsica e àteros istentos. Sa reina est torra issa, sa Sagra de sa Pulenta, manifestatzione chi ocannu lompet a sa de barantunu editziones. Ma in mesu ddoe est fintzas su de bìndighi Addòbios natzionales de is pulentàrgios de Itàlia, is laboratòrios de turismu esperientziale, chi ant permìtere de bìere de acanta comente totu si faghent is produsimentos de su territòriu, dae sa motzarella a su casu, a su mele, e ddoe at a èssere fintzas sa Sartilliedda, chi dae Aristanis tramudat a Arborea cun chimbe parìllias de cadderis piticheddos. 

Comente a semper, si prevident tastaduras de bator mandiares fatos cun pulenta e sa festa de sa birra.

Cunfirmadu fintzas s’Addòbiu natzionale de is pulentàrgios, cun delegatziones chi arribant dae totu Itàlia. A manera particulare, ddoe ant a èssere presentes pulentàrgios de Vènetu, Làtziu, Marcas e Toscana, cun tastadura de is mandiares, laboratòrios de turismu esperientziale, cun sa presèntzia de Campànnia Amiga de Coldiretti e de sa Cooperativa Il Seme.

Sa Pro Loco cun s’Amministratzione comunale sunt pensende de cuncordare unu parchègiu mannu, gratis, sena de miramentu, in sa bia 19 Est.

Su calendàriu de is apuntamentos dd’at a cuncordare prus a fine sa Pro Loco de Arborea in is meses imbenientes. A s’assòtziu dd’agiudant su Comune de Arborea, su sistema de is entes – 3A, sa Cooperativa de is produsidores, sa Banca de Arborea, s’Assessoradu de su Turismu de sa Regione Sarda, sa Fundatzione de Sardigna, sa Coldiretti e sa sienda Niedditas. Pro sa presèntzia de sa Sartilliedda, imbetzes, de importu mannu at a èssere sa collaboratzione cun sa Pro Loco de Aristanis.  

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.