Novas Aristanesas, venerdì 10 de maju de su 2024

Isetende s’abertura de su ponte de Marceddì – Bi cheret pagu a acabbare sos traballos in su ponte de Marceddì chi intro de s’istiu at a èssere torra a disponimentu de sa comunidade de Terraba e de totu sos chi andant in vacàntzia a Costa Birde, chi b’ant a pòdere passare torra a vetura.

Fiat serradu dae ghennàrgiu e b’aiat istadu paritzos discumbènios causados dae sos traballos. Sos operadores de Costa Birde fiant in pensamentu ca sos traballos fiant istentende e ca sos turistas pro sa presèntzia de su cantzellu rinuntziaiant a nch’imbàtere a sas plajas de costera, pro non fàghere su caminu prus longu.

E non cussu ebbia, finas su Consòrtziu Cooperativas Aunidas de sa Pisca Marceddì s’est invocadu paritzas bortas a sas autoridades marìtimas e forestales pro sos tantos piscadores isportivos chi fiant sighende a impreare su ponte de sa biddighedda pro fàghere s’atividade issoro nointames de sos divietos.

In su ponte – istrada pro intrare a sa biddighedda de Marceddì e caminu a cara a su mare de Arbus – si b’at a pòdere passare luego a sensu ùnicu alternadu e su tràficu l’at a regulare unu semàforu. Ant a èssere abertas finas sas ventaneddas a cara a mare, pro cambiare s’abba. Un’interventu isetadu finas dae sos piscadores de sa biddighedda, ca su ponte at impedidu de fàghere ossigenare s’abba e s’isetu est chi como s’òpera agiuet su setore faghende crèschere sa presèntzia de pische.

Custu est ebbia sa prima parte de sos traballos de adeguamentu de s’importante impiantu e giai a pustis de s’istadiale at a pòdere comintzare sa segunda parte de interventos gràtzias a un’àteru finantziamentu de 5 milliones de èuros de sa Regione. Finidu s’istiu, s’ant a cumpletare sos megioros de su ponte cun interventos istruturales, islargadura de su ponte ponende su guard-rail e in ùrtimu si b’ant a pònnere sas lughes.

“S’isetu est chi, cando in su ponte si b’at a pòdere finalmente passare, sa biddighedda nostra potzat tènnere efetos positivos pro su turismu, ma finas pro sos piscadores e sos ristorantes, chi sunt atividades de primore de su territòriu nostru” at naradu su vitze-sìndigu e assessore pro sos Traballos pùblicos Andrea Grussu.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.