Novas Aristanesas, mèrcuris 8 de maju de su 2024

Sa Die mundiale de sa Fibromialgia – Cun prus de 2 milliones de malàdios in Itàlia, pro su prus fèminas, sa fibromialgia non permitit de fàghere sas fainas de onni die a sa gente chi nde sufrit, provochende in mùsculos e ossos de totu su carenadu unu dolore crònicu e invalidante.

Pro fàghere a connòschere a sa gente custu disturbu, chi bortas meda est trascuradu o pagu connotu, est istada istituida pro su 12 de maju sa Die mundiale de sa Fibromialgia.

At a aderire a s’initziativa, cun atopos e manifestatziones, finas carchi comune de sa provìntzia.

Si movet dae Marrùbiu sàbadu 11 de maju cun una passigiada intro de bidda e cun s’inauguratzione de una banchina noa in colore viola. At a sighire unu cunvegnu in ue at a intervènnere s’Amministratzione comunale, sa referente regionale de su Comitadu Fibromialgici Uniti Anna Ligia e unos cantos professionistas. Intre custos sa nutritzionista Ilaria Dalla Riva, s’istrutore motòriu Daniele Piras e su reumatòlogu Raffaele Sestu.

In Santeru s’initziativa in programma pro su 12 de maju previdet de allùghere a colore viola unu monumentu de sa bidda.

Domìniga die prena de impignos finas in Aristanis, cun sas propostas aprontadas dae su Comitadu Fibromialgici Uniti e su Comune. Si comintzat a sas 9 cun s’inauguratzione de una banchina viola, de pònnere in viale Rockfeller, a cara a s’ispidale Santu Martinu.

A pustis de sa tzerimònia in presèntzia de sas autoridades comunales e de sos rapresentantes de su Comitadu, s’at a andare a su Teatru Santu Martinu pro su cunvegnu “Fibromialgia: l’armatura invisibile”, chi at a comintzare cun sa projetzione de unu cortometràgiu e cun sos saludos de su sìndigu Massimiliano Sanna e de s’assessora Carmen Murru.

A pustis, b’at a àere paritzos interventos. Ant a faeddare s’anestesista Giuseppe Obinu, s’esperta de ago-puntura Antonella Ladu, sa psichiatra Silvia Piredda, su reumatòlogu Egidio Camerada e sas referentes de su CFU Sardigna, Anna Ligia e Marisa Zoccheddu.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.