Novas Aristanesas, mèrcuris 15 de maju de su 2024

Novas Aristanesas, mèrcuris 15 de maju de su 2024

Is dificultades de sa sanidade – In provìntzia de Aristanis su setore de sa sanidade sighit a connòschere una situatzione non bona. Un’esempru est sa chèscia de is mèigos de base, chi ant minetzadu de si dimìtere totus in sinnu de chèscia contras de sa Asl 5. E pro ite? Pro more de is tratenutas me in is istipèndios, cun puntas chi lompent fintzas a tres mìgia èuros, pro is malàidos chi non sunt classificados. In un’assemblea provintziale istraordinària ant detzisu de fungudare mègius sa chistione.

Fintzas su Comitadu pro su diritu a sa salude de sa provìntzia de Aristanis est in chirca de rispostas: mancari sa Asl de Aristanis apat fatu carchi passu in dae in antis, su Comitadu torrat a denuntziare sa situatzione chi non si podet prus suportare de s’ispidale de Santu Martinu.

Su Comitadu at cuncordadu unu dibatu pùblicu intituladu “Sa salude non si bendet, sa sanidade si defensat”, a ue ddoe ant a pigare parte espertos meda.

Ma sa denùntzia de sa situatzione grave de sa sanidade in Sardigna non si firmat a intro de is làcanas de sa provìntzia de Aristanis, ma lompet fintzas a Casteddu, in ue ant a isfilare totu is càmitzes biancos de Sardigna pro nàrrere boh! a sa violèntzia contras de is operadores sanitàrios.

Is mèigos de sa provìntzia de Aristanis chi ant a isfilare in su Cabulogu de regione ant a èssere prus de chimbanta, e ant a regordare unu de is acontèssidos de violèntzia prus malos de is ùrtimos annos: sa morte de sa collega Roberta Zedda, dotoressa originària de Seddori, chi comente a Barbara Capovani, mèigu psichiatra, morta in s’ispidale Santa Crara de Pisa, dd’aiant morta cando fiat in servìtziu in s’ambulatòriu de Sabarussa.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.