Novas Aristanesas, martis 7 de maju de su 2024

Sas azaleas de s’AIRC – Ant a èssere meda sas pratzas de sa provìntzia chi finas ocannu ant a retzire sos voluntàrios impignados in sa bèndida solidale de sas azaleas de sa chirca de Airc, s’assòtziu italianu pro sa chirca relativa a su càncaru.

S’azalea de Airc oramai est collegada a pare cun sa Festa de sa Mama, a su puntu chi sa bèndida est fissada pro sa coa de chida de s’11 e 12 de maju.

In sa die de sàbadu s’at a pòdere agiuare sa chirca comporende sa prantighedda in su tzentru cummertziale Le Botti de Arborea, in pratza de su Mercadu in Arcidanu e in carrera Lionora in Santeru.

Domìniga si torrat a Arborea, ma custa borta in pratza Maria Ausiliatrice. Sos voluntàrios ant a èssere operativos finas in pratza de sa Sea in Abas, in pratza Roma in Aristanis, in pratza de sa Sea in Terraba, in pratza Paba Giuanne XXIII in Mòguru, in pratza Santu Micheli Arcànghelu in Gonnostramatza, in cursu Umberto in Gonnonò, in pratza de Crèsia in Biddobrana e in pratza Cornus in Cùglieri.

No ant a mancare in su salone parrochiale de Boàtiri, in pratza de Crèsia in Zrofoliu, in pratza Parròchia in Àidumajore, in pratza IV Novembre in Bosa, in pratza Mercadu in Sune, in pratza Santu Giuanne in Magumadas, in pratza IV Novembre in Ula e in pratza Marconi in Làconi.

Duas dies dedicadas a sa bèndida solidale in Crabas in pratza Lionora de Arbarè; in Tramatza a cara a crèsia; in su pratzale de sa domo comunale de Narabuìa e in su pratzale de crèsia in Uras; in pratza Màrtires in Milis. In Ilartzi s’ant a fàghere duas bancarellas, una in dae in antis de crèsia e una in cursu Umberto. Finas Sabarussa nd’at a tènnere duas, una in cursu Fratelli Cervi e s’àtera in pratza Indipendèntzia.

In ùrtimu, sas azaleas s’ant a pòdere comporare finas in pratza Sedda in Samugheo, in pratza Umberto in Sorradile, in pratza de s’Olia in Tresnuraghes e in Neoneli. In Ollasta s’ant a pòdere comporare giai dae chenàbura in s’edìcula chi est in su parcu de pratza Europa.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.