Novas Aristanesas, giòbia 9 de maju de su 2024
9 Maggio 2024
Tres dies de addòbios in provìntzia de Aristanis – Tres prendas de connòschere de su patrimòniu artìsticu e paritzos addòbios culturales. In provìntzia de Aristanis sa coa de chida si presentat prena de apuntamentos.
Si comintzat cras, chenàbura 10 de maju, cun sa presentada de su libru “Raccontami” de Pietro Marongiu a sas 6 de sero in su Tzentru Servìtzios Culturales UNLA de Aristanis. Sabrina Sanna at a faeddare cun s’autore e Paolo Vanacore si-nd’at a incurare de sas leturas.
Semper in Aristanis, sàbadu 11 e domìniga 12 de maju b’est s’apuntamentu tzitadinu de Monumentos Abertos in cumpangia de sos alunnos de sas iscolas e de sos voluntàrios. S’ant a pòdere bisitare logos e monumentos meda e in prus partetzipare a paritzas initziativas a tema. S’elencu cumpletu si podet agatare in monumentiaperti.com. A sos monumentos si bi podet intrare sena pagare dae sas 9,30 a sas 13 e dae sas 15,30 a sas 19.
Sàbadu dae sas 10,30, in sa crèsia de su Cramu b’est finas sa rassigna musicale “Notas de classe in su Cramu”, cun sos alunnos de sas iscolas segundàrias de 1u e 2u gradu a indiritzu musicale de s’Iscola tzìvica de mùsica tzitadina, s’Istitutu cumprensivu de Crabas e sos voluntàrios de su Touring Club.
A sero, imbetzes, s’archi-pìscamu emèritu Ignazio Sanna at a presentare su libru suo “Testimoni d’eterno nel tempo. Le sfide attuali dell’antropologia cristiana” a sas 18,30 in s’auditòrium Santu Domìnigu.
E non solu: oe e cras, in sa domo pro fèrias Stella Maris de Turre Manna, si festant sos 70 annos dae cando ant fundadu su Masci, Movimentu de Adultos Scout Catòlicos Italianos, cun duas mesas temàticas, mentres in Samugheo sàbadu in su Museu MURATS a sas 18,30 comintzat sa mustra “Ti ses bestida de biancu”, a incuru de Anna Rita Punzo, dedicada a sa poetissa Pippa Bacca.
Sa matessi die, ma in Crabas, s’apuntamentu est imbetzes cun s’ammentu “Sa Passione de Cristos”, a incuru de sa Shams Academy de Aristanis, in collaboratzione intre sas parròchias de Crabas e sa Fundatzione Mont’ ‘e Prama, cun s’agiudu de su Comune de Crabas. Su sero at a comintzare cun sa presentada de su libru de Mussegnore Ignazio Sanna, a sas 21, in pratza Istagnu.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.