Novas Aristanesas, giòbia 23 de maju de su 2024

Novas Aristanesas, giòbia 23 de maju de su 2024

Pro avalorare s’istèrgiu de terra – Una mustra permanente pro su promovimentu e avaloramentu de s’istèrgiu de terra e de sa tzeràmica artìstica de Aristanis. Custa est s’idea de s’Amministratzione comunale, nàschida a sa serrada de sa de batòrdighi editziones de su “Turnu de bia de is Congiolàrgios – S’arte de is tzeramistas”.

Sa mustra mercadu, aberta in su Palàtziu de is Arcais totu sa simana de is festas de Paschighedda fintzas a Pasca de is tres rees, aiat incassiadu 7.000 èuros. Est unu resurtadu bellu, de ispera, mègius de su de is ùrtimas editziones de su “Turnu”.

Su cuncordu dd’aiant contivigiadu su Comune de Aristanis e sa Confartesania, cun s’agiudu de sa Pro Loco, de su Fablab Aristanis Est e de sa Cna. Su litzeu artìsticu “Carlo Contini”, in prus, at arrichidu sa mustra cun unas cantas tzeràmicas istòricas fatas dae is dischentes, dae is annos Setanta de su sèculu passadu fintzas a dies de oe.

“Sa mustra mercadu fiat andada bene meda”, at naradu s’assessora de is Fainas produsidoras de su Comune de Aristanis. “Aiamus tentu unu resurtadu bellu siat pro su chi pertocat is bèndidas siat pro su nùmeru de bisitadores. Diat èssere una cosa bella a àere in Aristanis una mustra aberta a totu annu, cun is òperas de is congiolàrgios artistas nostros”.

“Su resurtadu nos donat ispera”, at naradu su segretàriu generale de Confartesania Aristanis Marco Franceschi. In su Palàtziu de is Arcais si ddoe podiant bìere òperas de ses siendas artesanas aristanesas: Tzeràmicas artìsticas de Valentina Pisu, Tzeràmicas Manis, Laboratòriu Piras, LuceBuio, is tzeràmicas de Margherita Pilloni e CMA, Tzeràmicas Maistros de Arte.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.