Novas Aristanesas, giòbia 16 de maju de su 2024

Novas Aristanesas, giòbia 16 de maju de su 2024

Sa biatzesa de su portu de Aristanis/Santa Justa – A su portu de Aristanis/Santa Justa ddoe at arribadu prus pagu laore (- 15 %) e prodùsidos petrolìferos refinados (- 39,1 %), ma sunt crèschidas de su 207,5 % is importatziones de gas naturale lìcuidu, chi dae 3.000 tonnelladas chi nd’aiat arribadu ocannu passadu ocannu nd’at arribadu a tres bortas, est a nàrrere prus de 9.000.

Su retratu de is movimentatziones de mare in su portu de Aristanis – Santa Justa dd’at tiradu s’Autoridade de Sistema portuale de su mare de Sardigna. Ocannu passadu s’est connota un’ismèngua a pustis de sa crèschida de s’annu in antis. De seguru pro more de sa gherra chi sa Rùssia at incarreradu contras de s’Ucraina e de s’incarimentu ispantosu de su prètziu de s’energia.

Ocannu passadu, in totu, intra de importatziones e esportatziones, in su portu ddoe sunt passadas agiomai 1,5 milliones de tonnelladas de mertze. Un’ispera bella dda ghetat, però, s’abbiatzamentu de su sistema de is naves de crotziera. Si duos annos a immoe a su portu de Aristanis – Santa Justa non ddoe aiat arribadu nemmancu una nave, ocannu passadu de naves nd’at arribadu unas cantas, unu sinnale bellu de abbiatzamentu de cussu setore. Un’ispinta prus manna pro su setore at a arribare in su benidore dae sa Zona econòmica ispetziale. Sa Zona econòmica ispetziale isbòligat, difatis, unu profetu mannu pro is impresas chi cherent investire in sa zona industriale.

Torrende a is datos cuncordados dae s’Autoridade de Sistema portuale de su mare de Sardigna, is nùmeros nde faghent essire a pìgiu una movimentazione prus de mertzes sòlidas chi non lìcuidas. E, mancari ddoe esseret sa gherra in Ucraina, is importatziones de alimentos, de mangimes e de sèmene pro ògiu sunt crèschidas de su 23,7 %. Ma sunt andadas bene fintzas is importatziones de carbone fòssile e lignite (+ 93,1 %), mentras sunt ismenguadas de su 17,7 % is esportatziones de minerales, tzimentu e carchina.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.