Novas Aristanesas, mèrcuris 3 de abrile de su 2024

Novas Aristanesas, mèrcuris 3 de abrile de su 2024

“Gramsci bidu dae a palas de is inferriadas” – Sunt istadas prus de setanta is òperas arribadas dae is presones de totu Itàlia e chi si podent bìere in sa mustra cuncordada in sa sala de sa Domo in ue est nàschidu Antoni Gramsci, in Abas, aberta in ocasione de s’inauguratzione de sa de chimbe editziones de su cuncursu de pintura “Peppinetto Boy” intituladu “Gramsci bidu dae a palas de is inferriadas”.

Is binchidores de ocannu ddos at seberados sa giuria formada dae Paolo Sirena, diretore generale de sa Fundatzione Pranu de sa Jara, dae s’artista de Abas Massimo Spiga e dae Lucia Siddi, istòrica de s’arte e ideadora de su Museu diotzesanu de Arte sagrada de Abas.

A sa tzerimònia ufitziale ddoe ant pigadu parte su sìndigu de Abas Francesco Mereu, su professore de Disciplinas de s’educatzione e de s’ispetàculu de s’Universidade Carlo Bo de Urbinu e presidente de su Coordinamentu natzionale Teatru in presone e un’òspite de importu, est a nàrrere su Garante natzionale de is persones privadas de sa libertade personale, Mauro Palma.

Protagonistas de s’addòbiu non sunt istadas is òperas isceti, ma fintzas sa chistione de comente totu s’arte potzat èssere una possibilidade de riscatu pro is presoneris. Nd’ant faeddadu Mauro Palma, cun s’interventu intituladu “S’immàgine, su faeddu, s’isprigu” , e Vito Minoia cun  “Artes, persones, mudaduras pro una cultura noa”.

Nàschidu in su 2016 dae un’idea de s’Assòtziu culturale “Domo in ue est nàschidu Gramsci”, su cuncursu prèmiat is òperas artìsticas de is presoneris de Itàlia, donende-ddis sa possibilidade de “si nche fuire” a manera virtuale dae su chi faghent ònnia die in presone.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.