Novas Aristanesas, mèrcuris 10 de abrile de su 2024

Novas Aristanesas, mèrcuris 10 de abrile de su 2024

Bìsitas a sa diga de Busache – A pustis de is bisitas ghiadas chi su FAI at cuncordadu in ocasione de is Dies de Beranu, sa diga “Lionora de Arbaree” de Busache torrat a abèrrere pro su pùblicu.

Is bisitadores ant a pòdere iscobèrrere una de is digas prus mannas de Europa. Mancari in is prenotatziones sa pretzedèntzia dda tèngiant is tzitadinos de Busache e de Ula, a tenore de is domandas chi ant a arribare si diat pòdere dare sa possibilidade de pigare parte a custa die de connoschèntzia fintzas a is bisitadores istràngios.

“Is bisitas ghiadas ddas at contivigiare s’ingegneri Meloni e unu tècnicu de Busache in pensione, ma chi cussu fràigu ddu connoschet bene meda, Mariolino Deidda. Paris cun issos ddoe ant a èssere àteros tècnicos”, at naradu su sìndigu de Busache, Giovanni Orrù.

A palas de su sèberu de domandare un’abertura istraordinària ddoe sunt is busachesos meda chi in 26 annos no ant pòdidu bisitare unu de is logos sìmbolu de su Barigadu. “Unos cantos cumpaesanos ant espressadu su disìgiu de dda bìere e, pro cussu, apo domandadu – paris cun sa comunidade de Ula – a s’ingegneri Roberto Meloni, responsàbile de su setore digas de s’Enas, de pòdere torrare a gosare de custa oportunidade”, narat su sìndigu Orrù.

Ùnicu logu de sa provìntzia de Aristanis abertu dae su FAI in is Dies de Beranu, sa bisita a sa diga “Lionora de Arbaree” fiat istada agradèssida meda dae sa gente, e giai a pagas dies dae s’abertura de is prenotatziones non ddoe aiat prus logu.

Sunt istados prus de 500 is bisitadores de totu sa Sardigna chi, in cussa ocasione, aint tentu s’oportunidade de bisitare su fràigu de sa Cantonera de Busache, connoschende una de is gallerias de sa diga e podende bìere fintzas unu siluru de sa de duas gherras mundiales abarradu arrèschidu in sa retza de amparu de sa diga.

Sa bisita, in prus, dd’ant arrichida is aprofundamentos ofertos dae ingegneris e àteros espertos, chi ant fatu iscobèrrere a is bisitadores is progetos de su fràigu chi permitit de illebiare su sidi de una parte de importu de sa Sardigna.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.