Novas Aristanesas, martis 16 de abrile de su 2024

Novas Aristanesas, martis 16 de abrile de su 2024

Is biàgios de istrutzione de is istudiantes – In custas primas chidas de beranu peri is bias de sa provìntzia de Aristanis si bient fatu-fatu postales de turismu chi nche portant a gita a is istudiantes de is iscolas. Dae is iscolas primàrias a cussas segundàrias de primu gradu a is iscolas mannas, sunt semper de prus is classes interessadas a is bisitas a is logos de sa cultura de sa provìntzia de Aristanis, cussòrgia in ue si ddoe agatant logos archeològicos e istòricos de importu. Unu de custos est su Museu de Crabas, de seguru favorèssidu dae sa presèntzia de is istàtuas de is Gigantes de Mont’’e Prama. In sa simana de Pasca Manna apenas passada ddoe at andadu gente meda e in custas dies ddoe lompent dosinas de postales cun is pitzocheddos de iscola chi faghent una bisita ghiada a cussos logos. Bortas meda chie biet su Museu si lompet fintzas a su Sinis de Crabas, pro bìere su chi abarrat de sa tzitade antiga de Tharros.

Ma in provìntzia de Aristanis fintzas àteros logos ispantosos oferint sa possibilidade de cuncordare bisitas pro is dischentes de is iscolas sardas. In Abbasanta, a su fràigu de su nuraghe Losa, faghet a ddoe arribare a discansu pro ite ca s’agatat in mesu de sa Sardigna, me in su rugheri intra de s’Istatale 131 e s’Istatale 131 DCN. A pagu tretu (una pariga de chilòmetros) ddoe est fintzas su putzu sagradu de Santa Cristina, in sartu de Paulle, mentras in Barigadu, lassadu su Guiltzier, si podent bìere is testimonias archeològicas de Fordongianus: su chi abarrat de sa tzitade antiga de Forum Traiani, cun is bàngios termales fraigados dae is Romanos, e – a intro de bidda – sa Domo aragonesa. Torrende a su Guiltzier, imbetzes, àteru logu chi is pitzocheddos de iscola podent bisitare est sa Domo de Antoni Gramsci, filòsofu e polìticu connotu e istudiadu in totu su mundu, chi fiat nàschidu in Abas, ma chi nche aiat passadu sa pipiesa e una parte de sa gioventude in Ilartzi, in ue in sa domo sua ddoe ant fatu unu museu dedicadu a issu.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.