Novas Aristanesas, lunis 29 de abrile de su 2024

Novas Aristanesas, lunis 29 de abrile de su 2024

Consìgios pro is bagnantes, sardos e turistas – Su tempus bellu de beranu favoresset is passigiadas oru oru de mare e sunt giai medas is sardos e is turistas chi nche passant custas dies bellas de sa coa de abrile in mare pro si leare unu pagheddu de sole.

A bortas, però, acontesset chi is oras passadas in is prajas no siat oras de pasu e de ispàssiu. Un’esempru est sa prajedda acanta de s’arcu de s’Architu, in sa marina de Cùglieri, chi si nde fiat chistionadu meda pro more de sa tìrria intra de Comune e Guàrdia de Costera contras de is bagnantes sena de règulas.

S’intrada a sa praja, difatis, est proibida dae su 2009 pro more de su fatu chi dae sa costera de rocas chi s’agatat a subra de sa prajedda fatu-fatu nde ruet carchi pedra manna, ma is amantiosos de cussu logu non bolent renuntziare a una die passada in cussu tretu de mare, a pagos metros dae s’arcu.

E, mancari siant intervènnidos sa Forestale e is agentes de sa Politzia locale pro nche fàghere retirare ombrellones, asciugamanos e sa gente chi ddoe fiat, mancari una pariga de dies a pustis nde siant isderrocadas àteras pedras dae sa costera, sunt medas ancoras is chi sighint a abitare sa praja, ponende in arriscu sa seguresa issoro e frighende-si-nde de is proibimentos.

Dae Putzu Idu puru lompet carchi esempru de gente maleducada: comente sinnalant is chi ddoe bivent, sa borgata bortas meda est prena de àliga, chi oramai faghet parte de su panorama de cussos logos.

E si is chi abitant cussas prajas non si-nche portant in fatu s’àliga chi produent, àteros sighint a nde furare arena e pedra. E no est sa prima borta: s’istajone no est ancoras cumentzada, ma sunt giai lòmpidas unas cantas sinnalatziones de furas de arena, pedra e àteras cosas dae is prajas de Sardigna.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.