Novas Aristanesas, giòbia 4 de abrile de su 2024

Novas Aristanesas, giòbia 4 de abrile de su 2024

S’Istat pùblicat is datos in contu de s’ocupatzione – Sardigna Impresa at publicadu sa relata noa de s’Istat cun is datos in contu de su livellu de ocupatzione in s’ìsula nostra. Su nùmeru de is disocupados, difatis, at ismenguadu, cun unu – 0.1% chi nche faghet calare su tassu de is persones chi ant pèrdidu su traballu a su 7,8%, mancari su nùmeru de is ocupados esseret istàbile a su 60,9% cunforma a primìtzios de annu e mancari esseret istàbile fintzas su nùmeru de is inocupados – est a nàrrere is chi no ant mai traballadu, non chircant traballu e non sunt istudiende – cun una pertzentuale de su 33,8 %.

In dae in antis de is istatìsticas chi incoragint, in provìntzia de Aristanis comente si siat medas tenent ancoras sa dificultade de agatare traballu: comente a Marcello, un’òmine de chimbanta annos chi dae annos meda fiat chirchende unu traballu a pedra furriada e chi at fatu un’apellu disisperadu chi nd’at fatu essire a pìgiu non solu sa cunditzione trista de disocupados meda, ma fintzas su fatu chi sa domanda de traballu e s’oferta dae parte de is siendas andant onniuna pro contu suo.

Comente at iscritu, Marcello nche at passadu is ùrtimos 15 annos arrangende-si cun carchi traballeddu a iscuse, a pustis chi aiat pèrdidu su traballu in unas cantas siendas chi non dd’aiant mai pigadu a craru, respetende sa lege. E at domandadu agiutòriu!

E luegos dd’ant torradu isceda: una filera longa de siendas de sa provìntzia de Aristanis, mòvidas dae su bonucoro, ant ofertu unu traballu a Marcello, chi a pustis de tempus meda at pòdidu torrare a firmare unu cuntratu regulare.

Ma custu contu acabbadu bene faghet nàschere una duda: comente podet acontèssere chi siendas meda sunt chirchende personale, ma disocupados meda non nche resessent a agatare traballu? Comente a duas lìnias deretas parallelas, is bisòngios de is traballadores e cussos de is siendas paret chi non s’inrughent, sighende onniuna s’àndala sua.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.