Novas Aristanesas, giòbia 18 de abrile de su 2024

Novas Aristanesas, giòbia 18 de abrile de su 2024

Is giòvanos isportivos aristanesos – Unu muntone mannu de medàllias e de trofeos, ma fintzas sa conchista de tìtulos de importu: movende dae is artes martziales pro arribare a is iscachis, is pitzocheddos de sa provìntzia de Aristanis si sunt seberados in custas ùrtimas dies in unas cantas disciplinas, essende a pìgiu che a campiones a beru.

Cumentzamus cun sos resurtados ispantosos de is atletas de s’iscola de Karate ASD Mura de Tzeddiani in su Trofeu Matsumura Tzitade de Uri. Matilde Delogu est furriada a domo cun sa medàllia de oro in sa disciplina de su Kumite e una de prata in su Kata.

Sara Fenu, chi ddoe at pigadu parte pro sa prima borta, at otentu imbetzes su brunzu, mentras Eshter Marras est lòmpida sa de bator. Resurtadu bonu fintzas pro Greta Lutzu, in gara intra de is noeddos de Kumite, chi si nde at a ammentare de sa prima esperièntzia sua in su campionadu regionale cun una cualificatzione pro is finales natzionales, in programma in Òstia in su mese de maju.

Sa GS Judo de Terraba, imbetzes, at otentu unu prèmiu cun su judoka suo Gianluca Spanu: gràtzias a su àere bintu in tres trivas de bator, s’atleta at otentu unu brunzu me in sa prima editzione de su Trofeu de su tessìngiu, chi s’est fatu in is dies passadas in Toscana.

Ma custu est s’ùrtimu de is trofeos chi ant retzidu is atletas de su tatami terrabesu: in martzu, difatis, Alessio Loi, at bintu unu brunzu me in su Trofeu Itàlia di Tàrantu.

Bator primos postos e ses cualificatziones me in is finales natzionales de Tarvìsiu: custu, imbetzes, est su bilàntziu pro is giòvanos de sa provìntzia de Aristanis cun is bìnchidas de is iscachistas me in is Campionados regionales Under 18 acasagiados in sa palestra comunale de Marrùbiu.

Ma sa provìntzia de Aristanis tenet a campiones fintzas a is marrubiesos Marco Valenza pro is Juniores, Francesco Cau pro is Allievos Under 16 e Angelica Rocchiccioli pro sa categoria de is Allievas, e a s’aristanesu Emanuele Cancedda pro is Giovanos (suta de is 12 annos).

A prus de is binchidores, in s’istadiale imbeniente ant a bolare a Friuli-Venètzia Giùlia is marrubiesos Giorgio Cau e Saul Oliva, is terrabesos Lorenzo Zanda, Luca Pau e Lorenzo Ventrice e Victoria Garau de Arcidanu.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.