Novas Aristanesas, martis 12 de martzu de su 2024

Sa gherra contras de su pibitziri in provìntzia de Aristanis – Isetende chi arribent sos primos pibitziris, emergèntzia chi dae unos cantos annos a como atropèlliat sos sartos de Otzana e no at istraviadu mancu sa provìntzia de Aristanis, in Guiltzier e Barigadu sunt giai aprontende. S’est tenende a cròbiu sos giassos prus in arriscu. Un’annu a como, in custu tempus, fiant giai naschende sa cria in sos tretos de a intru de s’Ìsula, ocannu podet èssere chi istentet prus cunsiderende ca sunt caladas sas temperaduras e at pròpidu.

In sa gherra contras a su pibitziri est impinnada Laore, s’Assessoradu regionale a s’agricultura at postu in manos a s’agentzia sa diretzione de sas fainas. Ddoe at però crititzidades. “No ant iscurtadu a sos territòrios, a sos sìndigos a sas siendas agrìculas.” narat su sìndigu de Sèdilo Salvatore Pes, “Fortzes si podiant cuncordare atziones ispetzìficas e prus profetosas cunformas a su chi ant fatu”.

E a pustis ddoe est sa gestione de sos terrinos. “Ant faeddadu meda de arare. Ma a ite puntu semus? A como non nos paret chi apant fatu cosa meda”, at naradu semper su sìndigu de Sèdilo, “De su progetu pro traballare sos terrinos non si nde ischit prus nudda. E no ischimus si a sa fine de sos contos s’ant a pòdere impreare sos drones. Un’annu de tempus ddu aiat pro tènnere sas autorizatziones: arribadas sunt?”.

A nde passare prus contu de su tema de su pibintziri est su chi domandat fintzas su sìndigu de Sorradile, Pietro Arca, chi at invitadu a s’esecutivu de Alessandra Todde a fàghere una mesa regionale pro si cunfrontare e pònnere paris istitutziones locales e categorias econòmicas, a prus de pònnere in evidèntzia ca tocat a apurare chie si devet incurare de interessare a sos voluntàrios in sa gherra direta contras a su pibitziri. “Custa responsabilidade”, narat Pietro Arca, “non podet èssere de sos sìndigos. Imbetzes pro cantu atenet a s’aradura, si cumintzamus como no est tardu: s’abba de custas dies nos permitit de torrare a interbènnere”.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.