Novas Aristanesas, giòbia 28 de martzu de su 2024

Tres biddas sena de abba in provìntzia de Aristanis – Sighit s’infadu in Boàtiri, Arriora e Milis: dae una chedda de dies non si podet tocare s’abba de sa rete pùblica. In Boàtiri, sas crititzidades nde sunt essidas a campu duas chidas a como, cun s’ordinàntzia de su sìndigu, Alberto Pippia, de su 15 de martzu passadu chi proibit de pònnere s’abba a bufare e a fàghere a papare pro sa presèntzia manna de metallos e batèrios.

Sa pròpia cosa at fatu su sìndigu de Arriora puru, Lorenzo Pinna, a pustis de sas anàlisi fatas a sos campiones leados dae sa rete ìdrica comunale, imbetzes in Tzeddiani non ddu at àpidu problemas. 

Sas biddas sunt collegadas a su benale de Lutzanas e su 21 de matzu passadu Abbanoa at apuradu ca sa calidade de s’abba fiat megiorada e sos paràmetros torrados a norma.

Como sunt in servìtziu sas autobotes siat in Boràdili, in sa pratza a canta a sa cantina Madau bècia, dae sas noe a sas duas, e siat in Arriora semper dae sas noe a sas duas in pratza de Europa.

Peruna nova pro Milis, in ue balet ancora su divietu de impitare s’abba pro bufare e fàghere a papare chi at firmadu su sìndigu Monica Ortu. Sas autobotes sunt in servìtziu dae sas noe a sa una, in bia de Eleonora de Arbarè, imbetzes a serigheddu, dae sa una a sas bator de sero, in bia de Berlinguer.

Pro sa bidda de Milis custa situatzione a dolu mannu non est cosa noa: in sos annos sunt essidas ordinàntzias meda pro s’abba chi non si podiat bufare semper pro s’intrulladura in su benale a pustis de àere pròpidu.

“Sa bidda tenet unu benale cosa sua, ma sa calidade de s’abba no est prus cussa de in antis”, at nadu Abbanoa. “Sunt faghende unu progetu pro unu cundutu nou. In s’interis si faghent sas anàlisi pro controllare sa situatzione.”

In un’addòbiu cun s’Egas aiant propostu de collegare a pare sa rete de s’abba de Milis a s’acuedotu chi collegat Bonàrcado e Aristanis. Unu traballu de unos duos milliones de èuros, chi s’Ente de guvernu de s’abba in Sardigna deviat agatare.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.