Novas Aristanesas, giòbia 21 de martzu de su 2024

Sirbones: intra de ismèngua autorizada e chèscias de is assòtzios animalistas – Dae su Sinis, e in particulare dae Crabas, sunt acanta de cumintzare interventos pro controllare sos animales agrestes e parare fronte a su nùmeru mannu de sirbones pro amparare sas atividades agrìculas e sa biodiversidade de sos sartos. Dd’at fatu a ischire Confagricoltura Oristano a pustis de s’addòbiu chi at cuncordadu sa Provìntzia su 12 de martzu passadu.

In s’addòbiu, a in ue ant leadu parte sos rapresentantes de su Corpus Forestale e Vigilàntzia Ambientale e sa ASL locale, ant cunfirmadu comente in custos ùrtimos tempos sos pegos sunt faghende dannu a sa cosa pastinada, ma fintzas intzidentes istradales e situatziones perigulosas pro sa gente chi bivet in tretu de Aristanis. Su sìndigu de Crabas e totu, Andrea Abis, nd’at pesadu sa chistione bortas meda cun sas autoridades cumpetentes.

In custas dies est naschidu unu comitadu ispontàneu de unos dughentos tzitadinos, prontos a fàghere carchi cosa, paris a unos cantos assòtzios animalistas. “Firmade s’ismèngua autorizadade sos sirbones in su Sinis”: est custu chi pedint a sa presidente de sa Regione sarda, Alessandra Todde.

Sa bidea est fintzas cussa de presentare ricursu a su Tar pro unos cantos puntos dubidosos e de averiguare de su pianu comente su de non àere fatu su tzensimentu de sos sirbones e de sos dannos tentos. In sa cosa, est intervènnida sa Lav, chi su Comitadu naschidu a nou at informadu, e in unu comunicadu at cuntestadu “sos corpos de fusile comente chi siat s’ùnica solutzione in su raportu òmine-animales agrestes”.

 “A bochire sos pegos de una ratza isperdende.nche.dda dae unu territòriu no est cosa ne ètica e ne ecològica”, si leghet in su documentu, “sa natura mudat cun sos ecuilìbrios suos mancari nos si nche inferchimus in mesu. Tocat a cambiare fògiu e no a detzìdere comente chi s’òmine siat semper a su tzentru de su mundu e a intervènnere reconnoschende a totu sas ratzas su diritu de esìstere e bìvere in libertade, respetende.nde s’etologia e su bisòngiu de campare.”

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.