Novas Aristanesas, giòbia 14 de martzu de su 2024

Sa coa de chida in provìntzia de Aristanis – Sa de su 16 e su 17 de martzu est una coa de chida rica de apuntamentos in provìntzia de Aristanis.

In Narabuia ddoe faghent sa Sagra de is Tzìpulas: sàbadu sa Pro Loco at a fàghere iscobèrrere is bellesas de su logu e is segretos de is tzìpulas a bentu, unu durche narabuiesu. S’ant a pòdere bìere is logos bellos de su sartu e de bidda, tastare is frituras de su Carrasegare e s’ant a pòdere baddare baddos sardos.

In Abas su sàbadu a merie at a èssere dedicadu a s’ambiente, cun una passigiada ecològica cuncordada dae Plastic Free, chi at a mòvere a is bator de merie. In su caminu, dae su distribudore de benzina a su tzentru pro s’impreu, a subra de unu montigru, si nd’at a pòdere boddire s’àliga fuliada oru oru de is bias.

In Bonàrcadu, imbetzes, apuntamentu cun sa presentada de su libru “Logos – Is logos de Bonàrcadu” de Salvatore Vacca, a is ses e mesu de merie, in sa cantina betza. A prus de s’autore, ant a faeddare s’archeòlogu e diretore de s’assòtziu Tocoele, Giuseppe Maisola, e su presidente de s’assòtziu, Antonio Vacca.

Su domìnigu de Nureci at a èssere dedicadu a s’isport cun su Trofeu “Funtana ‘e Susu”, sa gara a bitzicleta dedicada a s’arregordu de Gianni Fois, su politziotu mortu in un’intzidente acontèssidu in su rugheri de Tiria unos cantos annos a oe. A is 10.00, is chi ddoe ant a pigare parte ant a pedalare in un’àndala de 75 chilòmetros, cun mòvida dae Nureci e arribu a Nureci etotu. 

Ma in custa coa de chida at a fàghere a bisitare fintzas is mustras propostas in provìntzia. In Arborea s’ant a pòdere bìere is iscatos fotogràficos de Manuela Fa in sa mustra “Problemàtica”, pensada pro sensibilizare in contu de sa violèntzia de genere.

In Aristanis si podent bisitare ancoras is mustras de su Museu Diotzesanu Arborensu intitulada “Via Crucis”, de Giovanni Dettori, e “Su Mistèriu de sa Pasca Manna”, e sa mustra de sa Pinacoteca “Unu Contini torradu a agatare, antzis duos …”.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.