Novas Aristanesas, chenàbura 29 de martzu de su 2024

Mammas e babbos aunidos si chèsciant pro sa mancàntzia de pediatras – Sighit s’emergèntzia sanitària pro sa mancàntzia de pediatras in provìntzia de Aristanis. Una situatzione chi at portadu a sas mammas aristanesas a narrère su chi pensant in unu grupu Facebook “Sos pediatras Aristanis e Provìntzia 2024” chi tenet oe 1.100 iscritos.

Unu grupu chi, a pustis de àere regortu sas tantas testimonias de dificultade manna e emergèntzia de sas famìllias sena de assistèntzia pediàtrica, como est prontu a lòmpere a sa Asl de Aristanis pro pregontare un’addòbiu pùblicu.

 “Nch’amus a leare unu resumu a sa Asl, una deghina de fògios cun sos post prus de importu e amus a pedire de nos retzire comente rapresentàntzia de su grupu e de nos informare in contu de sa situatzione”, at naradu s’amministradora de su grupu, Simona Capriotti, chi at fatu nàschere su grupu social “unu pagu pro su disisperu e unu pagu pro su ferenu”.

Sunt meda a beru sas famìllias sena de pediatras, in manera particulare cussas chi tenent pitzinnos cun disabilidade grae o maladias oncològicas. Calicuna de issas at leadu un’àteru caminu, comente a nche passare a su mèigu de famìllia ma àteras, chi non tenent mancu cussu, no ischint a s’ala de si dare pro biere reconnotu su chi diat èssere una diritu issoro.

Ddoe est fintzas chie at detzididu de andare a unu pediatra provisòriu, duas bortas a sa chida, comente ant fatu a ischire unas cantas mammas de su tretu de Mòguru e de su Parte Montis o chie, su cantu podet, andat a sos privados pro s’assegurare de tènnere s’assistèntzia chi ddi bisòngiat.

Sas mammas reunidas in custu grupu Facebook ant detzididu de andare a faeddare a sa dirigèntzia de sa Asl, ant a domandare contu fintzas de su cuncursu bogadu sas dies passadas pro sas sedes sena de pediatra de su 2024. In Provìntzia de Aristanis sas sedes sena de dotore sunt 5: duas pro su distretu de Aristanis e tres pro su de Abas-Terraba. In s’elencu de sas sedes mancant, intra de sas àteras cosas, fintzas Santu Lussùrgiu, Bonàrcado, Sèneghe e Paulle.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.