Sa Bursa de istùdiu “Antonello Pinna” – Sunt de biddas diferentes de sa provìntzia de Aristanis is 17 diplomados a nou chi ant mandadu sa candidadura issoro pro otènnere sa “Bursa de istùdiu Antonello Pinna” pro meressimentos in iscola.
Fata nàschere dae s’iscientziadu aristanesu Graziano Pinna, oe professore assotziadu in sa University of Illinois Chicago, sa Bursa est dedicada a sa memòria de su frade Antonello Pinna, mortu in antis de su tempus, chi si fiat diplomadu in su Litzeu scientìficu “Marianu IV” de Aristanis.
Is istudiantes candidados sunt aristanesos e de biddas de sa provìntzia comente a Ilartzi, Neoneli, Nurachi e Sèdilo; 13 sunt pitzocheddas e 4 pitzocheddos, totus intra de 18 e 19 annos.
Su prus si sunt diplomados in su Litzeu “Marianu IV” de Arbaree de Aristanis o in su Litzeu de Ilartzi, bator si sunt diplomados in su Litzeu clàssicu “De Castro”. Ant a premiare a is chi si sunt seberados de prus, cunsideradu chi sete candidados ant pigadu su votu de 100/100 cun lode e is àteros su de 100/100.
Ma in su sèberu de is candidados no ant cunsideradu is votos isceti, ma fintzas s’impignu in su voluntariadu, sa cunditzione econòmica de sa famìllia, su caminu chi ant fatu in iscola, su de èssere racumandados dae tres professores e sa lìtera de presentatzione dae se, cun is bisos e is isperas pro su tempus benidore.
Su prèmiu est dedicadu a sa tzitade de Aristanis e dd’ant a cunsignare su 9 de freàrgiu in sa sala de su Consìgiu comunale, presente su primu tzitadinu. Su primu classificadu at a bìnchere 3.000 èuros, mentras 1.000 èuros sunt su prèmiu pro su segundu; a custos reconnoschimentos si-ddoe atzunghet unu “Mentovu pro meressimentu”, pro sa carrièra fata in iscola.
Sa commissione dda formant professore Graziano Pinna cun Alberta Lai, Marcello Alecci, Francesca Lucaria Puggioni e Sara Cappello, tres professionistas e sa binchidora de sa de duas Editziones de su Prèmiu.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
