Novas Aristanesas, martis 16 de freàrgiu de su 2024

Duas operatziones annoadoras in s’ispidale de Santu Martinu – In tretu de prus pagu de unu mese, s’istrutura dipartimentale de s’ispidale Santu Martinu de Aristanis at fatu duas operatziones annoadoras, cun s’ispera de assegurare una vida mègius a malàidos cun maladias difìtziles. 

Su primu l’at fatu su grupu de mèigos in su mese de ghennàrgiu passadu e at prevididu sa “denervatzione” de s’artèria renale in un’òmine antzianu, chi fiat arrischende meda de tènnere un’ ictus o un’ infartu. 

S’òmine de 85 annos a dolu mannu non rispondiat prus a sas curas e portaiat sa pressione màssima cun valores acanta a sos 180, e pro custu est resurtadu su candidadu giustu pro custa pràtica noa, suportada bene fintzas dae sos betzos. A pustis de s’operatzione s’òmine est torradu a domo e at a dèpere fàghere controllos pro bìere comente est andende sa salude sua. 

S’àtera operatzione l’ant fata pagas dies a como a un’òmine de 75 annos chi sufriat de angina pectoris. In custu casu puru su malàidu non rispondiat bene a sas curas: duncas pro custu issu puru fiat su candidadu giustu. 

S’operatzione at prevididu s’impiantu de unu stent de metallu in su coro, chi at fatu un’istringhimentu in sa vena printzipale. Gasi est megiorada sa capatzidade de su carenadu de bogare ossìgenu dae su sàmbene de sas artèrias pro alimentare su coro. 

Mancari s’operatzione siat andada bene, como su malàidu, chi benit dae un’àtera Asl, at a dèpere èssere monitoradu pro carchi mese pro averiguare si b’at istadu megioria a pustis de s’operatzione. 

Comente ant sutalineadu dae s’Asl 5, sas duas operatziones faghent parte de unu programma de megioria e annoamentu de sas curas propostas a sos malàidos de s’Istrutura dipartimentale de Emodinàmica. In fatis sa punna est cussa de megiorare s’assistèntzia a sos malàidos, chi ant a pòdere tènnere curas mègius. 

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.