Novas Aristanesas, lunis 12 de freàrgiu de su 2024

In Aristanis sos cadderis piticheddos de sa Sartilliedda – Protagonistas beros oe in Aristanis, lunis de carrasegare, sunt sos cadderis piticheddos chi current sa Sartilliedda 2024 a caddu de sos cadditos de sa Giara, torrende a fàghere gasi totu sos momentos de s’isfida a caddu traditzionale. A ghiare sa manifestatzione, organizada comente semper dae sa Pro loco de Aristanis, at a èssere Luca Piras, 17 annos, de Aristanis, chi s’at a bestire de Componidoreddu. 

A caddu de Montepulciano, unu cadditu de ratza Giarab de 18 annos, su capu-cursa giòvanu est acumpangiadu dae sos cumpàngios de parìllia: Gabriele Piras, 15 annos, issu puru de Aristanis, e Gabriele Palmas, 14 annos, de Casteddu-sardu. 

Comente si costumat, s’isfida comintzat a sa una de merie cun su rituale de sa vestitzione, in pratza Roma suta sa turre de Marianu. Agiuadu dae pitzocheddas cun su costùmene traditzionale de Aristanis, sas massaieddas, Luca Piras si ponet sa bestimenta chi leat comente modellu cussu de su Componidori de sa Sartìllia. Finida sa vestitzione de su Componidoreddu, s’acumpangiamentu, abertu dae sos tumbarinos piticos e dae sos trumbiteris piticos, isfilat a cara a carrera Duomo. Inoghe si faghet sa cursa traditzionale a sas istellas, e su cumintzu est prevididu a sas duas e mesa de merie.  Apuntamentu a pustis cun sa festa de sos coriàndulos chi non podet mancare. Comente ogni annu, in s’interis intre sa cursa a s’istella e s’esibitzione de sas parìllias de sos cadderis piticheddos de sa Giara de Aristanis, a totu sos pitzinnos e a sas pitzinnas presentes lis dant una tonnellada de coriàndulos.

Sighint sas parìllias: sos cadderis piticheddos dant prova de abilidade e coràgiu faghende galopare sos cadditos e faghende acrobatzias perigulosas, chi praghent meda a su pùbblicu. 

Chie cheret comporare sos billetes pro intrare a sas tribunas e assìstere gasi a sa Sartilliedda, podet andare a sa sede de sa Pro Loco de Aristanis in carrera Ciutadella De Menorca 14. 

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.