Novas Aristanesas, mèrcuris 10 de ghennàrgiu de su 2024

Su turismu e su motocross – Sa provìntzia de Aristanis amegat de s’aprontare pro un’apuntamentu de importu: is Internatzionales de Itàlia de Motocross e su Mundiale MXGP.

Su primu addòbiu isportivu est domìnigu 4 de freàrgiu: sa de deghe editziones de is Internatzionales at a arribare a Arriora. Pro is Mundiales, chi faghent parte de sa firmada “Grandu Prèmiu de Sardigna”, s’at a dèpere abetare fintzas a sa coa de chida de su 6 e su 7 de abrile. Est sa de bator bortas chi is campiones mundiales benint a su crossòdromu de Arriora.

Is addòbios de isport, comente si siat, no interessant a is amantiosos sardos de custu isport isceti, ma sunt fintzas unu motore de importu pro su turismu de totu sa provìntzia.

Su Campionadu de su mundu de Motocross, difatis, faghet parte de su programma de manifestatziones natzionales e internatzionales agiudadu dae sa Regione Sarda. “Unu programma de addòbios isportivos de importu chi, sende de interessu a livellu mediàticu, podet favorèssere su turismu, a manera particulare in is partes de a intro de s’ìsula, e faghet ammanniare s’oferta turìstica, paris cun is fainas chi amegamus de incarrerare pro avalorare su connotu, s’enogastronomia e su turismu ativu”, at naradu s’assessore de su Turismu Gianni Chessa.

In su surcu de bòlere mudare sa Sardigna in un’Ìsula de s’isport, unu muntone de logos de acasàgiu e de retzimentu de sa provìntzia ant a pòdere traballare bene in ocasione de custos apuntamentos isportivos.

In provìntzia de Aristanis, albergos meda amegant de si preparare pro acasagiare a is campiones e a is tifosos issoro. A parre de s’albergadore Paolo Pradelli, si previdet unu traballu mannu gràtzias a custos apuntamentos de su Motocross.

Est de acòrdiu fintzas Rossella Sanna, imprendidora aristanesa e mere de duos albergos in sa tzitade de Lionora. “Bene bènnidas siant manifestatziones che a custas, chi agiudant a illonghiare s’istajone. Nde tenimus bisòngiu, pro ite ca pro mantènnere abertos is albergos in su mese de ghennàrgiu bisòngiat de èssere atrividos meda!”.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.