Novas Aristanesas, martis 30 de ghennàrgiu de su 2024

In Aristanis sos rituales chi acumpàngiant cara a su Carrasegare – Bi cheret pagu oramai a su primu momentu ufitziale chi sinnalat s’intrada de totu sa comunidade aristanesa in sa currera a caddu de su connotu, sa Sartìllia: Santa Maria de Candelas.S’apuntamentu est pro chenàbura 2 de freàrgiu.

Sas protagonistas de sa die ant a èssere sos duos grèmios: su Grèmiu de sos Massajos e su Grèmiu de sos Mastros de linna de Santu Giusepe. Su primu at a atopare a sas 7,30 a sa crèsia de Santu Giuanne de Frores, imbetzes su segundu a sas 8,30 a sa Sea.

A pustis de sa missa, comente previdet sa traditzione, sos oberajos majores onniunu pro su Grèmiu suo nch’ant a leare sas candelas beneitas a domo de sos duos cumponidores.

S’ària de su carrasegare aristanesu, a pustis, at a tramudare a su bighinadu istòricu de Su Brugu chi s’est aprontende pro domìniga 4 de freàrgiu a duos apuntamentos chi non si podent pèrdere: sa beneditzione de sos caddos e cadderis de sa Sartìllia, in pratza Santu Efis, e sa Sartill’ ‘e Canna. Sa beneditzione s’at a fàghere a pustis de sa missa de sas 10,30. Ant a acumpangiare sa tzerimònia finas sos tamburinos e trumbiteris giòvanos de sa Pro loco de Aristanis, capitanados dae Marco Turnu.

A su rituale bi pigat parte finas sa parìllia printzipale de sa Sartill’ ‘e Canna: est sa prima borta pro su cumponidoreddu, Mattia Onida de 9 annos, acumpangiadu dae Giorgia Putzolu, segundu, e Perla Ruggero, tertzu.

A merie comintzat sa Sartill’ ‘e Canna, isetada meda dae sos prus piticos. Sos cadditos de canna, fatos sas chidas in antis dae sos voluntàrios de s’Assòtziu pro s’amparu e sa crèschida de sos cadditos de canna, capitanados dae su presidente Giancarlo Mureddu, sunt prontos pro èssere “domados” dae sos pitzinnos pro sa tìpica Sartill’ ‘e Canna e pro sas cursas issoro a fua istèrrida imitende sos cadderis de sa Sartìllia. Sa manifestatzione at a comintzare a sas duas, semper in pratza Santu Efis, e a primu s’at a fàghere sa bestidura de su cumponidoreddu.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.