Novas Aristanesas, lunis 29 de ghennàrgiu de su 2024

Novas in sa sanidade in provìntzia de Aristanis – Unu ASCoT nou in Arborea, bator nòminas importantes, tres professionistas noos in servìtziu in s’ispidale de Ilartzi e unu primadu pro sa Asl de Aristanis. Sunt custos sos ùrtimos agiornamentos chi pertocant sa sanidade in provìntzia de Aristanis.

Chenàbura passada at comintzadu su servìtziu s’ambulatòriu istraordinàriu territoriale nou de Arborea. Su servìtziu est pro sos residentes chi sunt abarrados sena dotore. S’ambulatòriu est abertu ogni chenàbura dae sas 15,15 a sas 20,15 e su sàbadu dae sas 8,30 a sas 13,30 in carrera Romagna. Àrtziat gosi a 27 su nùmeru de sos ASCoT chi traballant in provìntzia.

Pro su chi pertocat Aristanis, su diretore generale de sa Asl 5, Angelo Maria Serrusi, at numenadu a Alessandro Baccoli diretore sòtziu-sanitàriu nou de s’azienda sanitària aristanesa. Paris cun issu, ant numenadu finas a bator primàrios noos: Vincenzo Pecoraro in s’Istrutura Cumplessa de Urologia, Francesco Dettori in sa de Cardiologia, Luca La Civita in Meighina Interna e Stefano Sau in su Prontu Sucursu.

Sos malàidos de s’ispidale de comunidade de Ilartzi imbetzes ant a pòdere contare subra de sa presèntzia de tres professionistas intrados in servìtziu a nou: unu cardiòlogu, unu geriatra e unu fisioterapista a oràriu cumpletu. In s’istrutura sanitària de Guìltzier su fisioterapista permitit a su servìtziu de riabilitatzione de èssere operativu in manera cumpleta e su cardiòlogu at a èssere presente pro duas oras a sa chida, semper pro sos malàidos de su  matessi ispidale.

Resurtadu importante est finas cussu in tema de preventzione: sa Asl 5 de Aristanis est sa prima azienda sanitària in Sardigna in contu de controllos oncològicos. S’Azienda sanitària aristanesa est imbàtida a sa pertzentuale prus arta de amparu in s’Ìsula pro sos controllos de su tumore de su cùcuru uterinu (48,23%), pro su tumore a sa tita (48,02%) e pro su tumore a s’istentina russa (44,49%).

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.