Novas Aristanesas, giòbia 25 de ghennàrgiu de su 2024

Sa Sartìllia – In custas dies Aristanis est in dillìriu: benende.nde su Carrasegare, si comintzat a intèndere s’ària de festa de sa Sartìllia.

Cun isetos mannos e cosas noas, in sas ùrtimas dies si sunt intesas una in fatu de s’àtera tantas novas in contu de torneu ecuestre istimadu chi s’at a fàghere domìniga 11 e martis 13 de freàrgiu.

A pustis de 24 oras ebbia dae s’incomintzu de sa bèndida in rete, in sa die de mèrcuris resurtant giai finidos sos billetes de calicuna de sas tribunas aprontadas in su tretu de sa cursa a s’isteddu. Intre custas sas chi s’ant a ammaniare in carrera de sa sea. Sa die prus disigiada dae sos ispetadores est pro seguru sa de domìniga.

Aprontende sas tribunas e sa pista benint finas sos primos divietos e cambiamentos in sa viabilidade de sa tzitade. Est giai comintzadu su divietu de si firmare (a pena de rimotzione), ma si b’at bisòngiu finas de passare, in sas carreras Vittorio Emanuele II e de sa sea, e dae su 29 de ghennàrgiu sas règulas s’ant a fàghere ancora prus istrintas.

Finas a su 13 de freàrgiu, difatis, ant a sighire sos divietos, ma ant a èssere iscritos totus in
cartellos fatos a posta.

Finas sa Fondazione Oristano dat règulas pro chie at a isfilare in costùmene sardu. Cando ant abertu sas iscritziones a sas isfiladas, chi iscadint su 10 de freàrgiu imbeniente, sunt istadas publicadas finas sas normas de cumportamentu.

In antis de totu si pedit puntualidade: sos figurantes s’ant a dèvere presentare siat domìniga siat martis a mesudie in carrera Solferino, e a pustis ancora a sas 3 e mesa in pratza Lionora. Sos organizadores ponent in craru chi sos figurantes si devent cumportare in manera cunforme e rispetare sas positziones chi lis ant dadu.

Totu sos figurantes s’ant a dèvere pònnere su costùmene cumpletu, sena de bi mancare nudda e sena de b’agiunghere cale si siat cosa, in pilos, in cara o in ungras, chi fatzat pensare a sos tempos modernos e non siat duncas adata a sa manera de si bestire de su connotu.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.