Novas Aristanesas, chenàbura 26 de ghennàrgiu de su 2024

Sa Die de sa Memòria in Aristanis – Finas ocannu su 27 de ghenàrgiu torrat sa Die de sa Memòria, una die dedicada a ammentare sos mortos de s’Olocàustu. Istituida dae s’Assemblea de sas Natziones Aunidas sa prima die de santandria de su 2005, ammentat sa data de liberatzione de su campu de cuntzentramentu de Auschwitz fata dae sos militares russos de s’Armada Ruja.

Finas sa provìntzia de Aristanis s’aunit a sas initziativas de ammentu chi s’ant a fàghere in totu su territòriu natzionale.

In Crabas sas initziativas sunt comintzadas oe cun unu laboratòriu de letura pro sos prus piticos in sa biblioteca comunale. Intituladu “Leturas de paghe: pro no ismentigare” at a tènnere a protagonistas paritzas òperas a tema comente “Su bolu de Sara” de Lorenza Farina e Sonia Possentini, “Su gelataju Tirelli” de Tama Meir e Yael Albert e “Sa pitzinna de su trenu” de Lorenza Farina. Sa die in fatu, a sos pitzinnos los at a ghiare in una riflessione su psicòlogu e espertu de cyberbullismu Luca Pisanu. Torrende a ammentare sos momentos drammàticos de sa Shoah ant a pòdere meledare in contu de sas emarginatziones de oe.

In Aristanis sàbadu mangianu s’at a pònnere comente a semper una corona de frores in dae in antis de sa targa de ammentu in pratza de Tzitade. A pustis b’at a èssere sa cunferèntzia “Sos efetos de sa polìtica de sa Germània nazista a pustis de pagu tempus e de tempus meda”, a cura de professore Christian Rossi. A sero s’at a fàghere un’atopu pro faeddare de sos presoneris militares italianos in sos lager nazistas, promòvida dae ANPI e Unla. Domìniga 28 b’at a èssere unu cuntzertu a tema in su Monastèriu de Santa Crara.

In Santeru, sàbadu ant a faeddare de sos disterrados sardos in una cunferèntzia pro sas iscolas in s’àula de su Cussìgiu. Finas in Useddus sos pitzocos ant a èssere protagonistas cun un’atopu in contu de sos disterros e de sos tantos chi ant postu sa vida in perìgulu pro sarvare a sos àteros.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.