Is addòbios de su primu de maju in provìntzia de Aristanis - Mancari is previsiones mèteu pro cras no siant bellas meda, pro ite ca su tempus at a èssere pagu seguru in totu sa provìntzia, sa Prima die de maju at a èssere pro medas una die de vacàntzia e de festa.

Si s'abba at a consigiare a calicunu de si-nde abarrare in domo, prandende in cumpangia de amigos, is chi detzident de isfidare s'abba ant a pòdere pigare parte a unu de is addòbios cuncordados in provìntzia de Aristanis.

Cumentzamus cun sa tzitade de Aristanis, in ue ddoe est "Primu de maju in Contea", unu merie de mùsica e ispàssiu chi pro su de tres annos paris faghent in pratza de Contea, sa paninoteca nòdida a duas rodas.

S'at a cumentzare a mesudie e s'at a tirare fintzas a su càbudu de chena cun una filera longa de ispetàculos: is The Wild Eyed, is A-Regeneration, is Reatzione, sa Patrick Abbate Band, is Black Code, is MegaherA e Pino Scotto. Ddoe at a èssere fintzas s'ispetàculu de su Magu Marik e sa Triva de is màndigos pitziosos. Is chi ddoe pigant parte ant a pòdere iscobèrrere in anteprima is apuntamentos de su Rock in Contea chi s'at a fàghere custu istadiale.

In Gonnostramatza ddoe ant cuncordadu sa de 15 editziones de sa Sagra de su Gatò, su durche tzacarrosu de mèndula insainetadu cun limone e connotu in totue in Sardigna.

Ocannu sa manifestatzione dda faghent paris cun sa de 22 editziones de sa rassigna "Artes e Traballos", chi at a permìtere a is bisitadores de iscobèrrere is traballos de su tempus passadu. Sa die at cumentzare cun is paradas de is produsimentos e cun sa prufessone in onore de santu Giusepe Artesanu, cun s'isfilada de is tratores e de àteras ainas de traballu.

A pustis de su pràngiu, s'ant a pòdere bìere is presentadas itinerantes de su grupu folk de Mòguru e s'ant a pòdere bisitare is domos antigas. Sa Sagra s'at a abbiatzare a is bator, cun sa tastadura de su gatò e sa mustra de s'aprontamentu de su durche. Su merie dd'at a alligrare s'ispetàculu folk de is Dilliriana, chi ant a sonare mùsica e baddos sardos.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.